Далей няма куды
Гэта трэба было бачыць, таму што паверыць у такое немагчыма. Тое, што завецца беларускай зборнай па футболе, а насамрэч зьяўляецца зборнай Гандурасу па гандурасізьме, учора змагалася супраць усіх што ні на ёсьць набыткаў беларускага футболу на міжнароднай арэне. Змагалася, праўда, ня сам-насам. У гэтым змаганьні ім дапамагала футбольная зборная Люксэмбургу. Так-так, тая самая, у якой гуляюць цырульнікі, дворнікі і іншыя грузчыкі; якім у прынцыпе ня сьвеціць нічога ў адборачных турнірах і ніколі ня будзе сьвяціць; якія гуляюць дзеля свайго задавальненьня і мажлівасьці спаткацца з сусьветнымі зоркамі (я не пра беларусаў, канечне); якія за гонар сваёй краіны ня сорамна прапусьціць энную колькасьць мячоў, калі пры гэтым яны заб’юць хоць аднаго; якія ў гэтым адборачным туры дагэтуль забівалі толькі аднойчы - Гандурасу беларусам; якія апошні раз ачкі ў міжнародных спаборніцтвах бралі 7 год таму - у сустрэчы з Гандурасам (даруйце, канечне ж, зь беларусамі) - згулялі ўнічыю… Сьпіс далёка няпоўны, але тут я хацеў распавесьці зусім не пра люксэмбуржцаў…
Учора зборная Гандурасу калхозьнікаў паказала, што іхнія магчымасьці практычна бязьмежныя. Люксэмбург па сутнасьці забіў нам двойчы (першы мяч не залічаны праз судзейскую памылку; ну й пашкадавалі нашага брамніка, які, выштурхваючы шпурляка з сеткі, атрымаў траўму і вымушаны быў сысьці з поля; ды й самі госьці ня надта спрачаліся зь няслушным рашэньнем судзьдзі), аднак канчатковага ліку 0:1 таксама хапае зь ліхвой. Госьці ўвесь матч тыкалі: а) шпурляка ў накірунку нашае брамы; б) нашых сьвіньняў худбалістаў лычом тварам у гной газон; пераўзышлі нас у колькасьці жоўтых картак у некалькі разоў, а перад самым сьвістком канчаткова ўтапталі нашых у неадмыўны бруд гэтым мячом… Так што яго нават цяжка й назваць незаслужаным(!). Бо нашыя не патрапілі аніводнага разу хаця б у штангу. А выйграць, калі ня б’еш па варотах, прынцыпова немажліва.
Ня ведаю, да чаго рыхтуе сваіх падначаленых сп.Штанге (ну відавочна ж, што ў штангі таксама трэба падцягнуць навыкі ўдараў), але ці ня час ужо біць па Штанге? Мне па шчырасьці імпанаваў і заўжды будзе імпанаваць сп.Пунтус, і мне шкада было, што такі спэцыяліст пакідае пост галоўнага трэнэру - ды яго проста аблілі крытыкай, пасьля якое апускаюцца рукі. Але які сэнс было ў разгары сэзону мяняць коней на пераправе, асьлі нам усё адно нічога ня сьвеціць?.. Колькі яшчэ трэба матчаў прайграць Штанге, каб яго турнулі так сама, як і ўсіх астатніх, не разумеючы, што ў адзін дзень нічога ня зьменіцца.
P.S. А раўналежна ў гэты самы час на іншым канале французы ў гасьцёх абыйгравалі каманду Фарэрскіх выспаў зь лікам 6:0…
